عمرك سألت نفسك مين أول واحد جاب عربية في مصر؟ طيب إيه كان رد فعل الناس لما شافوا الاختراع العجيب ده لاول مرة في شوارع القاهرة؟
في سنة 1890 شاف المصريين العربية لاول مرة وكان بالنسبة ليهم اختراع غريب لدرجة إنهم كانوا بيصفوها بإنها “بتجرها الشياطين”، وده لأن في الوقت ده كان كل العربيات اللي موجودة في مصر عبارة عن عربيات بتجرها الخيول، وحتى الخديوي توفيق واللي كان بيحكم مصر ما كانش عنده عربية في الوقت ده.
صاحب العربية دي كان الأمير عزيز حسن حفيد الخديوي، واللي كان بيدرس في جامعة اكسفورد في إنجلترا في الوقت ده.
وبعد استكمال دراسته في جامعة أكسفورد، قرر الأمير عزيز حسن إنه يسافر ألمانيا عشان يستكمل دراسته هناك، وبالفعل استقر لفترة في مدينة «بوتسدام» واللي أقام فيها واشتغل هناك لفترة.
وبعد وقت قليل قرر الأمير عزيز حسن إنه يسيب مدينة «بوتسدام» ويرجع مصر وفعلا رجع مصر سنة 1890 وكان معاه العربية بتاعته.
وكانت عربية الأمير عزيز حسن فرنسية الصنع من ماركة “دي ديون بوتون” وكانت بتشتغل بالبخار.
“دي ديون بوتون” كانت من أوائل شركات العربيات في العالم واللي تم افتتاحها سنة 1883 وكان مقرها الرئيسي في مدينة بوتو الفرنسية.
العربية لما كانت بتمشي في شوارع القاهرة كانت بتصيب السكان بالذعر، لدرجة إن الأمير عزيز حسن كان بيمشي قدامه 2 من الخدم عشان يوسعوا له الطريق، وفي مرة من المرات اللي خرج بيها الأمير عزيز حسن بعربيته خبط في عربية كارو واتسببت في أضرار كبيرة بالعربية الكارو، ده اللي خللى الناس تقول إن العربية دي مسكونة وبتجرها الشياطين.
بس من أغرب المواقف اللي حصلت بسبب عربية الأمير عزيز حسن كان في سنة 1904، لما قرر الامير عزيز حسن القيام بمغامرة مع اتنين من اصدقاءه ، وهي القيام برحلة من القاهرة الي الاسكندرية، وبالرغم من إن المسافة ما تتجاوزش الـ 210 كيلو إلا إن العربية أخدت 10 ساعات تقريبا، وده لأن العربية كانت أقصى سرعة ليها 20 كيلومتر في الساعة .
ولأن الطرق في مصر في الوقت ده ما كانتش ممهدة ولا مجهزة لسير العربيات، اضطر الأمير عزيز حسن إنه يمشي بالعربية بين الحقول والجسور على حافة الترع، فاتسببت العربية بتلف المزروعات وقتلت بعض الحيوانات الامر اللي احدث شبه رعب للفلاحين من ( العفريت ) اللي كان ماشي في قلب المزارع ، ودفع الأمير تعويضات للفلاحين، ودي كانت السفرية الوحيدة للأمير عزيز حسن بالعربية لأنه مكررهاش تاني ورجع من الإسكندرية للقاهرة بالقطر وقام بشحن العربية في قطر البضايع.
وبالرغم من إن الأمير عزيز حسن كان أول من دخل العربية مصر إلا إنه مكنش الوحيد ففي سنة 1905 وصلت مصر 10 عربيات وكان كلها مملوكة لنبلاء من العيلة المالكة.
ويقال كمان إن خديوي مصر عباس حلمي الثاني كان بيمتلك عربية اشتراها في وقت لاحق وكانت للترفيه مش للتنقل، وده لأن الطرق في الوقت ده ما كانتش مجهزة للعربيات بالإضافة لعدم توفر الوقود ، وكانت الحوادث كتير في الفترة دي زي اللي حصل مع الأمير محمد علي توفيق ولي عهد المملكة المصرية سنة 1901 لما اصطدم بسيارته في عربة كارو كانت محملة بالخشب، وسقطت كلها عليه فأدت إلى تحطم العربية واتسبب الحادث في إصابات بالغة للأمير…. ودي كانت قصة اول عربية تدخل مصر وقصة صاحبها.