أثارت الفنانة ريم مصطفى حالة من الجدل خلال الساعات القليلة الماضية عبر مواقع التواصل الاجتماعي، وتصدرت محرك البحث “جوجل”، بعد ظهورها مع الإعلامية لميس الحديدي خلال برنامج كلمة أخيرة على قناة ON.
حيث قالت: “حاليا مفيش علاقة حب، لكن بكرة الصبح يمكن محدش عارف، اللي عايزة أقوله إن الناس بتيجي عايزة تتجوز وخلاص، واخدينها ببساطة وهي مش بالبساطة دي، أي اتنين عايزين يكونوا مع بعض لازم يشوفوا هما بياخدوا قرارات عاملة إزاي علشان ميحصلش طلاق”. 
وأضافت: ولأول مرة تصرح ريم مصطفى حول زواجها السابق قالت: “في حاجات كتير الناس متعرفهاش عني، ومش عارفة إذا كان صح أقولها ولا لا، لكن أنا اتجوزت قبل كده، أنا مطلقة ويمكن لأول مرة بقولها في حياتي وبقولها لايف أنا أصلاً عندي ولدين”.
وأضافت ريم مصطفى: “أنا تزوجت صغيرة جداً، كان عمري 19 سنة، والتجربة دي كانت من أهم التجارب في حياتي، لأنها علمتني حاجة مهمة جدا، وهي إزاي تختاري شريك حياتك”.
من هو طليق ريم مصطفى والسر وراء طلاقها؟
وكشفت ريم مصطفى، خلال تصريحاتها في البرنامج، أن طليقها شخص محترم وابن أصول، مؤكدة أن علاقتها بطليقها ووالد نجليها علاقة جيدة جدا، وتابعت قائلة: “الحمد لله طليقي ابن ناس جداً، وراجل محترم، ويمكن الطلاق جه لأن احنا كنا اتنين مختلفين عن بعض تماما وليس بسبب إن هو سيء، لكن يوم ما هقع في مشكلة هو اللي هكلمه ويوم ما أحب أخد رأي حد في حاجة بردو هكلمه”.
وكشفت عن سر انفصالها، قائلة: “اتطلقنا علشان كنا مختلفين، اختلاف بجد بجد السما من الأرض” لافتة إلى أن هذا الاختلاف الجذري وقف وراء الانفصال، مضيفة: “إحنا عمرنا ما اتخانقنا، مكانش في ما بيننا مشاكل لكن مختلفين، حسيت في لحظة إننا عايشين حياة حلوة ومستقرة لكن كان في حاجة ناقصة”.
وقالت: “كنت بقعد أتكلم مع عمرو محمود ياسين، إن الطلاق مش معناه إن إحنا لازم نفرج الناس علينا ومحاكم وكده، أنا بتربطني بوالد أبنائي علاقة صداقة دي حقيقة مش كلام وخلاص، الحاجة الوحيدة اللي اتفقنا عليها هي تربية ولادنا فأنا مطلعة ولاد جمال جدا”.